Ayon sa ulat ng Philippine Star (2024), nasa 11 milyong Pilipino mula edad 5 hanggang 24 ang hindi nakapag-enroll nang maayos o walang pormal na edukasyon. Sa pagsisiyasat naman ng Philippine Institute of Development Studies (2023), ang mga sumusunod ay ang pangunahing dahilan kung bakit maraming kabataan ang hindi nabibigyan ng maayos at dekalidad na edukasyon sa ating bansa:

Kahirapan 
Ang kahirapan ay isang matagal nang problema sa ating bansa, at ang isa sa mga sektor na pinaka apektado nito ay ang edukasyon. Ayon sa ulat ng Philippine Statistics Authority sa taong 2023, 15.5% o humigit kumulang 17.54 milyon na Pilipino sa individual level ang mahirap. Samantala, nasa 2.7% o katumbas sa 740 libong pamilya ang proporsyon ng mga pamilyang Pilipino na hindi sapat ang kita upang matugunan ang kanilang pangunahing pangangailangan. Sa populasyon, ito ay humigit-kumulang 4.3% o 4.84 milyong Pilipino na naninirahan sa below the food thresholds noong 2023. Bilang resulta, nagiging masyadong mahal ang edukasyon para sa maraming pamilya, lalo na ang mga nasa pinaka mahihirap na komunidad, at sa halip na pumasok sa eskuwelahan ang mga bata ay napipilitan na lamang silang magtrabaho, na nagdudulot sa patuloy na pag-ikot ng kahirapan sa mga susunod na henerasyon.

Armed Conflicts 
Ang patuloy na labanan sa ilang lugar sa Pilipinas ay nagdudulot ng isang malaking problema sa edukasyon. Lalo nitong naapektuhan ang mga kabataan, kaya naman nahihirapan silang magpatuloy sa kanilang pag-aaral. Maraming mga paaralan ang nagsasara at ang mga mag-aaral ay napipilitang lumipat na lamang upang maging ligtas kung sakaling mayroon mang mangyaring labanan sa kanilang lugar.

Kakulangan sa mga Pasilidad at Imprastraktura
Ang isa pang malaking suliranin sa sistema ng edukasyon sa Pilipinas ay ang kakulangan ng mga mapagkukunan at pasilidad ng paaralan, lalo na sa mga malalayong lugar. Ang usaping ito ay karaniwang nakakaapekto sa maraming paaralan sa ating bansa.

Batay sa ulat ng Department of Education, humigit kumulang 5,000 paaralan sa Pilipinas ang mga walang sapat na kuryente, at nasa 10,000 mga paaralan naman ang walang access sa malinis na inuming tubig. Dahil dito, ang mga mag-aaral at mga guro ay nahaharap sa maraming kakulangan, na mayroong epekto sa kalidad ng edukasyon. Gayundin, maraming paaralan ang walang sapat na silid-aralan, textbooks, at kagamitan sa pagtuturo, na nagpapahirap sa mga mag-aaral na matuto nang maayos. At ang mga suliraning ito ay nangyayari hindi lamang sa mga rural areas kundi maging sa mga lungsod.

Digital Divide
 Ang pandemya ng COVID-19 ay nagdala rin suliranin sa sistema ng edukasyon sa ating bansa. Naapektuhan nito hindi lamang ang mga mag-aaral, ngunit pati na rin ang mga guro, magulang, at mga paaralan. Dahil sa mga kabilaang lockdowns, milyon-milyong mga mag-aaral ang kinakailangang lumipat sa online o distance learning, na naging mahirap para sa mga walang gadget o magandang internet connection. Isa sa malinaw na problema na dulot ng pandemya ay ang digital divide. Ang digital divide ay ang agwat sa pagitan ng mga taong may access sa teknolohiya at sa mga wala. Sa edukasyon, ang ibig sabihin ay malaking dehado ang mga mag-aaral na walang sapat na magagamit na gadget o internet kumpara sa mga mayroon nito. Batay sa survey ng Department of Education noong Hulyo 2020, lumabas na 64% lamang ng mga mag-aaral ang nagsabing mayroon silang smartphone, at 55% naman ang mayroong laptop o desktop computer, na nagpapakita na maraming kabataang mag-aaral ang naiiwan sa online learning.